而家，你云游四海、周游列国返嚟，买咗啲当地嘅土特产送畀亲友，都会好骄傲噉话：呢啲系坐飞机返嚟，好嘢嚟嘎。
 
而喺旧阵时，我哋个个都未曾坐过飞机嗰阵，就有一种零食，认真高贵嘞，要空运到家噶，你估下系乜嘢？

 
后生仔女肯定闻所未闻啦，我一讲，好多年长嘅朋友就会口水嗲嗲渧啰。飞机榄，点解叫飞机榄噶？
 
因为旧阵时，物质缺乏，飞机榄系沿街叫卖嘅，如果你想食，就大嗌一声，从楼上抛落钱嚟，卖榄嘅人就会将啲榄抛上三四层楼高畀顾客，卖榄人啲眼界认真犀利嘞，佢哋会将用草纸或者系布袋包扎好嘅鸡公榄，准确无误噉抛入你嘅窗户入面！呢个橄榄就好似系坐飞机上去嘅，“飞机榄”因此而得名。
 

飞机榄，系橄榄嘅一种，又叫和味鸡公榄、鸡公榄、卜卜榄，由鲜白榄秘制， 其实即系甘草榄，系用甘草等药材，用盐腌制而成噶，放好耐都唔会变坏，甘草味好浓，好好食嘎。飞机榄，系当年流行于省港澳地区嘅一种销售干果零食嘅一种方法，历史好长。过去啲零食都系沿街过巷叫卖，住响楼上嘅人需要时，干果小食就飞上去，所以就叫飞机榄。另外，又有一种公鸡骑嘅叫卖形式，叫鸡公榄，好似而家就剩翻广州上下九路仲有啧，其它嘅“啲榄坐直升机”嘅情境就不复存在嘞，令人十分怀念。
 
飞机榄，具体系几时发明嘅，想追根溯源，好似都唔系咁容易。喺相关嘅乡土历史书籍，亦都揾唔到咩线索，反正近代广州就有好多。“飞机榄”点解又叫“卜卜榄”？原来，卖榄人攞支木锤敲住装榄嘅绿色铁皮箱响度叫卖，卜卜声响噶。仲有就系，卖榄人胸前挂着一支嘀嗒走天涯，边走边吹，因为吹出来嘅声音就好似有人喺度大声嗌“飞机榄——”而得名。一包一包腌好嘅橄榄有辣有不辣。
 

传说中，因为家住三四楼嘅人太懒，最早系用麻绳绑住个竹篮取榄畀钱嘅，但系噉样比较慢。卖榄人后来直接将啲榄包好投到骑楼上面阳台、客厅当中。眼界越练越好，后来，卖榄人练就一身功夫，总可以百发百中，“飞机榄，飞机榄，飞上你天棚（天台）。”钱、货交易，一抛即成交，掂晒！
 
听讲啊，以前，香港地、广州市啲细路哥最感兴趣嘅，就系卖榄嘅小贩嘞。有啲卖鲜白榄嘅小贩上街叫卖嗰阵时，通常都会拉长腔调唱：“沙榄啵，茶滘货，一分钱，买两个。和味榄，唔好食，唔收货！食落爽甜无渣啵！食过好食呢，再来买过！”唱得有板有眼，够晒押韵，够晒吸引，惹得行人流晒口水，驻足而观，点都要吟出一分钱买佢两个叹下。卖鸡公榄嘅花样都几多下嘎，“嘀嘀嗒，嘀嘀嗒，嗒嘀嗒……”一阵唢呐声响，跟住有人喊：“鸡公榄，一分钱，榄两只。”随后，街头出现一只纸扎嘅七彩大公鸡，细路仔不知几开心，一下子就围埋上去嘞……
 

酸中带甜，齿颊留香。飞机榄，老少咸宜，令人印象深刻。嗰阵时啲甘草梅、咸酸桃、酸木瓜、酸姜、酸荞头……，呢啲街头小食，多数都系用白醋泡制，咬落去酸眯眯、脆生生，食过之后仲带有几分甘草嘅香味，简直妙极嘞。
 
随着后来物质生活嘅丰富，本小利微嘅生意仔就必然被淘汰，唔少老行当已经逐渐远离人们嘅生活，“飞机榄”只系其中之一。不过，作为一种乡土特色，一种民俗风情，各位老香港、老广州，一定系如数家珍，津津乐道，三日三夜都讲唔完。
 

（本文图片来自网络，如有版权请告知删除。）
 
作者简介：王小女子，一个从小就热爱文学和音乐的小女子，个人公众号：王小女子（gh-9abf8a3205fe）。
 
你可能还想看：
胖人语录：我喝水都会胖
生二胎跟你家的皇位继承有关系吗
为搏老虎乸一笑
没动力，难减肥
老公越老越轻松，老婆越老越可爱
不狠一点，真戒不了烟
 
谢谢你的关注和支持
转发和推荐是最好的鼓励
长按以下二维码
可关注“王小女子”的公众号